Namminersornerullutik Oqartussat isumaqatigiissuteqarfigalugit Københavnimi Kalaallit Nunaata Sinniisoqarfia Kalaallit Nunaanni sulisussanut nutaanut ilisarititsilluni pikkorissartitsisarpoq.
Pikkorissaanerit Kalaallit Nunaanni sulilersussanut tamanut peqataaffigineqarsinnaavoq - pisortani namminersortuniluunniit atorfinissimagaanni.
Sulisitsisup atorfinitsitani pikkorissarnissamut nalunaarutigissavaa, sapinngisamik pikkorissaasut email-ianut: kursus@ghsdk.dk
Atorfineqqaanut pikkorissarnerit qaammammut ataasiarluni ulluni marluusuni ingerlanneqartarpoq. Pikkorissarnerit nalinginnaasumik qaammatip aallartinnerani ingerlanneqartarpoq.
Juulimili pikkorissartitsineq ingerlanneqarneq ajorpoq aasami sulinngiffeqarnerit peqqutaallutik.
Pikkorissaaneq ulluni marlunni najuunnikkut ingerlanneqartarpoq - sisamanngorneq aammalu tallimanngorneq ilanngullugu nal. 09:00 - 16:30 (allannguisoqarsinnaavoq).
Pikkorissaaneq ingerlanneqartarpoq Kalaallit Nunaata Sinniisoqarfia: Strandgade 91, 1401 København.
Ulluni pikkorissarfiusussaasuni unnuisariaqartoqassappat ineqarniarneq aaqqissuunneqassaaq.
Akiliutigineqartumi ilaapput pikkorissarnermi ullut akornanni akunnittarfimmi unnuineq kiisalu nerisaqartitsineq tamakkerlugu, tamatumani ullueqqasiutit, kaffi, tii, imeq, kaagi aammalu naatitat pikkorissarnerup ingerlanerani.
Tamakkua saniatigut nammineq atuinerit peqataasup nammineerluni akilissavai.
Pikkorissaanermi peqataasoq Kalaallit Nunaanni ulluinnarni inuuneq kiisalu inuiaqatigiinni iluaqutissatut ilisimasassat pillugit paasitinneqartarpoq. Sapinngisatsinnik - soorunami nunamut pingaartitsineq aallaavigalugu - Kalaallit Nunaat ilisaritinniartarparput inuiaqatigiiusut siuarsimasut soqutiginartuusullu sukkulluunniit unammilligassanik naapitaqarfiusoq.
Makku sammineqartarput: Atassuteqaqatigiinneq aamma attaveqarneq, akileraarutit akitsuutillu pillugit paasisitsineq, CITES, uumasut pinngortitarlu, illoqarfiit, pinngortitami isumannaatsuunissaq, Kalaallit Nunaat piorsarsimasoq "qanganisamut" sanilliullugu, Namminersornerullutik Oqartussaaneq/Namminersorlutik Oqartussaanermut sanilliullugu, aatsitassarsiorneq, oqaatsit, isummat pigiliutiinnakkat, unammilligassat, eqqarsartaaseq, quiasoriaaseq sammilaarlugit, kiisalu kulturimik paasinninneq.
Pikkorissartut ataasiakkaat pisariaqartitaat pikkorissarnermullu peqataanera naapertorlugu pikkorissarneq aaqqissorniartarparput, pikkorissarneq tamanut uummaarissumik misigisaqartitsiniassammat.
Pikkorissarnissaq sioqqullugu immikkut unnuisissamik aaqqissuussisoqarsinnaavoq. Tamanna unnuineq suliffeqarfiup atorfinitsitsisup akuerisissutigisariaqarpaa, aamma suliffeqarfimmut atorfinitsitsisumut immikkut naatsorsorneqarluni akiligassinneqassaaq.
Tamatuma saniatigut angalanermut aningaasartuutit pikkorissarnerup akianut ilaatinneqanngilaq.
Aggusti aallaqqaataani (1. aggusti) 2025-vi aallarnerfigalugu ulluni marlunni pikkorissarneq, unnuineq ataaseq ullut pikkorissarfiit akornaniittoq, nerisaqarnerlu pikkorissarnerup nalaani ilanngullugit akeqarpoq DDK 7.500,-. Aappariinnut ulluni marlunni pikkorissarneq, unnuineq ataaseq ullut pikkorisarfiit akornaniittoq aamma nerisaqarneq pikkorissarnerup nalaani ilanngullugit akeqarpoq DDK 13.000,-.
Akunnittarfimmi unnuinissaq pisariaqartinneqanngippat pikkorissarnerup akigititaasup DDK 1.000,- inummut ataatsimut akikinneruvoq (juunip aallaqqaataani 2025 atuuttumi).
